Stay Connected:     Join our Facebook page   Follow us on Twitter   Subscribe to our YouTube channel
   
Monday, 29th May 2017

خلطة_بيتا: زيادة المصاريف، بين المكسب والنفخ

Posted on 22. Apr, 2013 by in Columns

وأنا ماشي يوم الأحد قبل اللي فات، بعد ما – إحم – إتعلم عليّا في ميدتيرم ”DLD“، لقيت طلاب كتير كده متجمعين في ال”Green Area“.. قعدت اسأل دول إيه مين دول، و عاوزين إيه يا ربي؟

عرفت إنهم بيعملوا مظاهرة منظمها إتحاد الطلبة، علشان الجامعة قررت تزود المصاريف تاني!

أنا الصراحة أول ما عرفت إن المصاريف زادت ٣ آلاف بس.. قلت الحمد لله! خلاص مش مهم يا فادي مش حوار، يعني ماهو نفخ بنفخ، و كدا كدا محصلة بعضها يا راجل.. وكمان بصراحة حسيت إن الطلبة دول مأفورين أوي، وإن مش من حقهم يعترضوا!

أيوه مش من حقهم، مش الجامعة كاتبة في ال ”Policy“ إنها من حقها تزود كل سنة لحد ١٠% باين؟ ده طبعاً بيعطيهم الحق إنهم ينفخونا، بدون أي إعتراض مننا أبداً!

وبعدين بما إننا إحنا أحسن جامعة في مصر – زي ما كنت أكدت في عمود آخر – فأكيد من الطبيعي جداً إن المصاريف تزيد بالطريقة دي يعني..

مش إحنا عندنا أحسن معيدين ودكاترة في مصر و لا إيه؟ و كمان أحسن ”Campus“ فيه كل الملاعب لكل الرياضات.. مش بنعمل إحنا معارض في الملاعب ونقفلها ٥ أيام في الإسبوع والشغل اللايح ده! لأ و كمان أحسن أكل ”فاست فوود“ في مصر، و”عم سعد“ يشهد، أحسن شهادة ومعترف بيها من ألمانيا من غير ما تعمل معادلة!

أنا الصراحة مش فاهم يعني، عاوزين إيه تاني علشان الجامعة متغلاش علينا!

المهم رحت أقول الكلام ده لواحد صاحبي ثورجي كده شوية، وقلت أقنعوا وأكسب فيه ثواب.. لقيتوا، بعد ما طبعاً صدر منه شوية ألفاظ مش لطيفة أبداَ، إبتدأ يحكيلي ليه هو و الطلبة دي كلها معترضين على زيادة المصاريف.

قال لي بصرف النظر عن اللي إنت قلتوا، أنا هفهمك في خلاصة أنا معترض ليه.. الفكرة مش فكرة فلوس ولا ٧% ولا الكلام ده، الفكرة فكرة مبدأ.. مبدأ إن أنا مش ”أوه پاپي، الجامعة زادت ٣ ولا ٤ آلاف“ فيدفعهم و خلاص، و الفكرة إن أنا بنى آدم عندي عقل ولازم أعرف فلوسي بتروح فين مش اه اه وخلاص.. و كمان اللى هيوافق دلوقتي على زيادة ٧%، بكرة هيزودوها ٧% تاني، و سبعة في سبعة ممكن تلاقي نفسك على آخر الخمس سنين بتدفع قد اللي إنت دخلت بيه مرتين ولا حاجة.

الصراحة بعد ما خلص كلامه أنا إتحمست جداً، ورحت إنضميت معاهم في المظاهرة، أصل بصراحة إترعبت لما قال لي إن المصاريف ممكن تزيد تاني، الواحد جيبه بيوجعوا يا جدع!

لأ بس شوية جد بقي.. الخلاصة إن إحنا – المفروض – طلبة عندها وعي مش قطيع و خلاص، ومش معنى إنك قادر تدفع الزيادة حتى لو ١٠ أضعاف إن إنت تسكت وتدفع.. إنت عندك عقل و واعي كفاية إنك ميتضحكش عليك بكوبي سنتر جديد.. (إيه ده لأ ثانية، ده في طباعة ”Wireless“؟)

من حقك كمان تسأل وتعرف فلوسك بتروح فين، من حقك تسأل و تعرف مكسب الجامعة كام بالضبط وده قانونى ولا لأ، من حقك تعترض ومن حقك إنك لو على حق كلامك يمشي.. إفتكر إنك لو إتعودت تقول اه وخلاص عشان ظروفك عادية، أكيد هايجي عليك يوم والجامعة هتسوء فيها، و هتكون ساعتها معترض بس مش هتعرف تنفذ اللي في دماغك بعد ما كنت سِكت قبل كده.. و مش بتكلم على الفلوس بس، ممكن ”System“ أو ”Policy“ أو ”Validation“ أو أي حاجة.

اللي إتعود يسكت و يِفوّت حاجة غلط مرة علشان مش متضرر منها، مش هيعرف بعد كده يعترض لما يرجع يلاقي مشكلة في الجامعة طحناه و مطلعة عينه.

و عندى رسالة بس صغيرة كده للإدارة.. ولكم في الAUC عبرة!

في الآخر حابب أشكر إتحاد الطلبة بشكل شخصى على إنهم وقفوا مع الطلبة ومصحصحين كده.. بان بجد إنه إتحاد منتخب من الطلبة فعلاً وحاسس بمشاكلهم لأنه ببساطة منهم.

حابب كمان أقول البقاء لله في سيف مصطفى.. الله يرحمه ويسكنه فسيح جناته، ويارب يقوّم عمر إيهاب وعمر أيمن بالسلامة إن شاء الله.. ربنا يصبّر أهاليهم و أصدقائهم جميعاً.


إبعتوا Commentatko أو الأفكار اللى تحبوا نكتبلكم عنها في التعليقات تحت أو على الهاشتاج ”#خلطة_بيتا“!

لقراءة عمود الإسبوع الماضي: لا يا أبو لسان طويل.. معندناش إحنا فتنة طائفية!


Leave a Reply

You must be logged in to post a comment.

 
 

 

Email